Di Pa

Nakasuot ang maliit na sumbrero

Pabaliktad

Puting pajama

At t-shirt

Nakaupo

Sa balkonahe

Sa ibabaw ng makikisig pang

Mga binti

Ni Papa

Hindi pa naisisilang

Ang mga batang manunukso sakin

Ng "taba!"

Tuwing ako'y

Magbibisekleta

Sa kabukiran

Minamahal palang

Ng kaniyang mga magulang

Ang klasmeyt kong

Aking ibubully

Sa Grade 1

Natututo palang

Maglaro

Ng ari

Ang babaeng

Iibigin ko

Hinahampas palang

Ng walis tambo

Mula sa mga kamay

Ng kaniyang tiyahin

Ang bungisngis kong kaibigan

Sa Batangas

Tinuturuan pa lamang

Ng Matematika

At Siyensiya

Ang Taong Grasang

Umiikot

Saming bahay-bahay

Dahil bata pa lamang ako

Noon

At lahat ng nangyari

Ay hindi pa nangyayari

Lahat ng di inakala

Ay dipa aakalain

Tulad ng balang

Hindi pa iniiwan ang baril

Tulad ng kidlat

Na inaantay ang kulog