Kabigat tan Bugan

Aliwan saray istorya manlapud saman a sagradon libro
so nanonotan ko'd sika, noagta say istoryam
nipaakar ëd si Kabigat tan Bugan a itongtong
na ambëlat iran gatin na salim ëd kiëw a takayan.

Onsigëp kan asakbongay ulom na ulës tan agmon
balot iparungtal so lupam tan iyabët mo'd saray pantitit mi
so andukëy a dëën. Kibatiktik kamid kwarto tan nagsitalon kami'd
sukong na kama lëlëg min bantayay kalkalnan iloob mo.

Insan sano andukëy lan maong so agmo pansalita,
lukasan mo'y sangim a agmi nanëngnëng
tan diad saratan ompaway so aralralëm mon boses
a ëbatan mi makapisit bason panëyag.

Papa, mankëbkëbiëw ak ëd saraman a impaniistoryam,
aliwan lapud antakot ak ëd sika no agta lapud likët ta sika
si Kabigat tan Bugan tan inawit mo'y malanglangwër min ilalam
ëd saman a arawi tan ambëtëbëtël a palandëy.

Patalos: Kabigat and Bugan