Këlang

Dia'd Santa Maria
walay këlang a agnasalambit.
Naliknam lambëngat
ëd baog, ëd kolokolong,
balët agmo nibësngaw.
Onarotoy ëd aping
ontëdtër ëd linmëtak a dalin
balët anggapo'y subol
a manëmpëy.

Lapud napgaan ira
nagsitaynan ira'y pipinabli.
Nagsitëkiab ëd biëk-taëw.
Nagsialmo'y mangiliktar.

Balët inër man so dapoan da
inër man so pisiruman da
ag dan balot niburin
awit-awit da mët lanlamang
itan a paët
a angayëw ëd dalin dan nanlapuan
tan siansian
mamapamaga'd aro,
likët, tan nagkalaotla
kabaliksan.

Pirawat dan lanang so pakasëmpët.
Pitamitam dan nadiwit ira lamët
na siplog na dagëm na kaumaan
na burakan ëd baybay
na ëgnay inad-aro
maniilalo
a nasalog ira'y isëmpët da
balët
alingwanan da'n

lanang a naëëkata'y
bobon a tinaynan.

Translation: Drought