Pilalëk

Kapaway ko'd pwerta
alas singko'd kabwasan
ambilungët ni
aliknak a tampol
a akblos ëd siak
so pilalëk
angitilak na ërmën
a kalkalnan ombëbëlat.

Ag nadëmët na nonot ko
ag nibalikas na liknaan ko
so ngaran to niyan
pilalëk
a natan
manyatawyataw
ëd dayat na pakalingwan.

Kayari pigaran bulan
kayari intaynan ko'd kongregasyon
nalmok lamët itan
sanën imbasig ko'y akop ko
ëd dingding na kwartok
ëd Santa Maria.

Singa kukot
a abalkot
na dili ton taklay
tan bikking
kupit iray mata
akayurong ëd bilungët
dima'd butaw
no inër tinaynan ko lan
nanaugip
ag nin siansia angaranan.

Patalos: Yearning