Labin Pinildit Ko'y Gamëgamët Nën Mama ëd Pwerta
Ibong so bilungët ëd saraman a labi'y
gonigon, ag pakaugip
payabol so nonot ko'd kalsada'y kisame
surob-surob ëd kawitkawit a eskinita'y
natan, nabuas, karuman.
Ngoyangoy ak lan linmoob ëd kwartok.
Inokbar ko'y kurbata tan medyas
tan tiniblong ko'y kama'y kaërmënan.
"Akin moak duduksaën, Ama,
anta dinuksam ak lan amimpiga?
Agko la napambiiga'y
kasalanan ta kabaglan!"
Tinmuktok ka.
("Anako...")
Siniim mo ak balët ag ka limoob.
("Anako...")
Inpiyam so gamegamet mo'd
pwerta'y impyirno.
"Anako..."
Balët anggapo la'y kabaliksan
na satan a salita.
Anggapo'y nanilalak ëd siak.
Taëp ak lambëngat
a ipapalir na dagëm.
Natan wadiya, nabuas anggapo la.
Karawalan so ngaran ko.
Katon inmalagëy ak
tan nilak a intulak
so pwertan kinmëna
amildit
ëd kuko
ëd laman
ëd pukel
ëd arom
a amëglëy
ëd sika
tan siak
tan say palbangon
a agni sinmabi.