Perdonam Iray Dumaralos

Lilinisay dumaralos so kaumaan
panamëglëy na ngalab
ëd nguro'y bislak a ëmbën to.

Angoba'y dalang so sampot
na nampuputëray pagëy,
daydayamin agla abagot.

Angga'd managaag la
so interon kaumaan a nalipos
na mansayaw a asëwëk.

Mangansiyon la'd satan so dagëm
a nanlapo'd amianën a manibok
tan kalkalnan mamatëy ëd pool.

Kaërëp na apoy mamatanir la'y asëwëk
a mamëtëk ëd sayan alog
paonla'd saman a sitio.

Tan diya'd isabi bilungët,
kasëmpët na dumaralos
say dalin manbukbukor lamët.

Ëd kaaralma'y labi kaandi asëwëk,
say kaumaan a datin binmalitok
magmaliw a bangkay a dinmëkërëkët.

Oniya uurasay dumaralos
so kasalanan to'd dalin a lamësën to
lalamët kabangon to'd malët a ugip.