Diya'd Pwerta'y Pebrero

Maksil so siplag na dagëm ëd paway.
Manuwab la'ray ibababan bulubulong na kapuntian.
Say kortinan aminpigak lan binalor,
aminpiga mët lan binmuskag.
Nabilang labat la 'ray agëw antis na Marso
tan mamatanir la'yan manatambayon bëtël.

Kamamanta,
okbarën la na kiëw na sineguelas so bestida to
tan igapo to la'y andukëy a panalagar
ëd isimit na ununan rosas.

Diya'd abay na dinmadapol ton lamolamot,
ondëën la 'ray karikaan
ëd kalkalnan ikurong na tiagëw
ëd onlëlëtak lan dalin,
ëd onaawang lan pader na abung,
ëd ompëpëtang a bintana,
ëd unëëgnab a baog kon manaalagar
ëd baog mo
angga'd ipawil lamët na bëtël.