La Carlota

Bagong taon, bagong pagasa
Tahimik na ang kampana
Dagat ang lumamon sa bata
Alon ang kumuha sa ina

Tanghaling tapat sa dalampasigan
Nahugasan na ang mga pinggan
Maliliit na yapak sa buhanginan
Pabulong na panalangin sa lumisan

Mainit na sumisikat ang araw
Paslit ay nagtatampisaw
Hawak ang bolang bughaw
Naglalaro sa mababaw

Umihip ang hanging malakas
Larua'y kinuha paitaas
Munting mga daliri nakataas
Nitong musmos na pantas

Nahulog ang bilog sa malayo
Ang bata'y nagsimulang tumakbo
Buhangi't tubig naglaro
Hanggang matatapaka'y naglaho

Walang sigaw na narinig
Napipi na ang kaniyang bibig
Tanging kumunoy sa may tubig
Ang natanaw ng umiibig

Bugso ng takot at pangamba
Ang pumaso sa mga paa
Mabilis ang karipas ng ina
Sa naghihingalong bata

Walang bantay sa paligid
Mag-isa siyang sumisid
Mga paa niyay namanhid
Ang dagat ay ganid

Pinilit niyang umahon
Papatay na ang mga alon
Nalalagas na mga dahon
Sa palibot ng kahon

Hawak niya ang mga kamay
Nitong malamig nang bangkay
Ng anak niyang hihimlay
Sa tubig na bahay

Kapos na siya sa hininga
Ngunit yakap-yakap parin niya
Ang una’t huli niyang ligaya
Kasama niyang papayapa

Nakatitig siya sa langit
Habang nalalasahan ang pait
Nitong dagat na nangagalit
Sa ilalim siya ipipiit

At sa kaniyang paglubog
Patungo sa mahabang pagtulog
Lahat ng ulap ay nahulog
Ang langit ay kumulog

Bagong taon, bagong pagasa
Tahimik na ang kalsada
Dagat ang lumamon sa bata
Alon ang kumuha sa ina