Kabigat tan Bugan

Aliwan saray istorya manlapud saman a sagradon libro
so nanonotan ko'd sika, noagta say istoryam
nipaakar ed si Kabigat tan Bugan a itongtong
na ambelat iran gatin na salim ed kiew a takayan.

Onsigep kan asakbongay ulom na ules tan agmon
balot iparungtal so lupam tan iyabet mo'd saray pantitit mi
so andukey a deen. Kibatiktik kamid kwarto tan nagsitalon kamid
sukong na kama leleg min bantayay kalkalnan iloob mo.

Insan sano andukey lan maong so agmo pansalita,
lukasan moy sangim a agmi nanengneng
tan diad saratan ompaway so aralralem mon boses
ya ebatan mi makapisit bason paneyag-eyag.

Papa, mankebkebiew ak ed saraman a impaniistoryam,
aliwan lapud antakot ak ed sika no agta lapud liket ta sika
si Kabigat tan Bugan tan inawit moy malanglangwer min ilalam
ed saman a arawi tan ambetebetel a palandey.

Patalos: kabigat and bugan