Lingët, Diad Gapo

1 Tan inkua'y Ama: "Onlësay lingët." Ët linmësay lingët. 2 Ët anëngnëng ton say lingët ët maabig, tan ginapoan ton pambiiga'y laman a nanlingët tan laman a ag alingëtan. Tinawag to'y unona ya Irap tan sa komadua ya Inawa. Tan walay mairap tan mainawa. Unonan agëw.

3 Ët inkua'y Ama: "Onlësay dumaralos ëd baëta'y ani tan akandalin, tan manbiigay karit tan plato." 4 Tan ontan so agawa. 5 Tan walay mairap tan mainawa. Komaduan agëw.

6 Insan inkua'y Ama: "Natipon ëd sakëy a sukong ira'y manlilingët pian onlësa'y amagan pasën." Tan ontan so agawa. 7 Tinawag na Ama so amagan pasën a Opisina, tan saray sukong a atalëm ëd lingët a Kaumaan, Kalsada, tan Tindaan. 8 Anëngnëng na Ama ya maabig iya. 9 Tan walay mairap tan mainawa. Komatlon agëw.

10 Insan inkua'y Ama: "Onlësa'y kwarta piyan wala'y pansisinggawan da. 11 Onkana 'yan panukata'y kablia'y kakamarërwa ra." 12 Tan ontan so agawa. Inyan to 'ray papel de bangko'd bulsay mayayaman tan sensilyo'd bulsay maiirap. 13 Tan walay mairap tan mainawa. Komapat a agëw.

14 Tan inkua'y Ama: "Napanoy asëwëk komo'y katawënan. Insenson ontatagëy manlapud saray bagat na tambutso tan pabrika." 15 Tan pinalsay Ama iray luluganan tan angkakabalëg a kompanya. Tan anëngnëng ton maabig iya. 16 Benendisionan to 'ra tan kuan to: "Manparakël kayo tan sakop yo'y interon dalin." 17 Tan walay mairap tan mainawa. Komaliman agëw.

16 Insan inkua'y Ama: "Mamawala komo'y dalin na pëtang a ag nin balot alikna'y anggan siopa. Atap a hurnon mangakmo'd amin." Tan ontan so agawa. 17 Anëngnëng na Ama ya inupot na masanton apoy so amin a pinalsa. Tan walay mairap tan mainawa. Komanëm ya agëw.

18 Ontan so impakasumpal na tawën tan dalin tan amin a bëngatlan wadtan. 19 Tan diad komapiton agëw, amin ët nampainawa.