Pitamitam

Pitamitam ko'y
siplag na dagëm ëd Patar
saray ambëtël a kabuwasa'd alog nën Tatay
tsokolaten kakaw no Disyimbri
tan say dërëmën—o say dërëmën

Pitamitam ko'y
panggiwgiw na abung sano babayoëy alimbusabos
lëmëk tan limpëk na ansakët sano mankikinilër
dëë'd Dala'y Ulëg sano mansirungët la
tan saray linat a nadadalanan tan napipilat

Pitamitam ko'y
andukëy iran panatalara'd bus diya'd krusing
nangis na aaso sano onsasabi ak
manatalara'd lamisaan a pising nën inak
amay letaw-letaw ed digo'y kilkilitis tan borak