TTCP 2

Nu ipase'y totoo so pigaran benga-bengatla ya masanting,
say arum ya benga-bengatla et magmaliw ya pangit.
Nu ipase'y totoo so pigaran benga-bengatla ya maabig,
say arum ya benga-bengatla et magmaliw ya mauges.

Papalsaey linmesa tan ag-linmesa so balang sakey.
Mantutulungan so mairap tan maininomay.
Ipapatalos na andukey tan antikey so balang sakey.
Akadepende so atagey tan aleksab ed sakey tan sakey.
Tutumbukay antis tan kayari so balang sakey.

Katon say Marunong
mankikimey anggano ag-onggagalaw
tan manbabangat anggano agoneesel.
Onlelesa iray benga-bengatla tan papaulyanan to iran onsabi;
naandipat iray benga-bengatla tan ibubulos to ira.
Walaan to anggano anggapo'y kayarian to,
mankikimey balet anggapo'y aalagaren to.
Nu asumpal lay kimey to, lingwanan to la.
Katon manbabayag itan lawas.