TTCP 20

Itundam so panononot mo, tan ontunda so gonigon mo.
Antoy pandumaan na on tan andi?
Antoy pandumaan na italona tan ikapoy?
Pablien mo ta met so papabliey arum,
arawian so aarawian da?
Ambabangil!

Manggiwgiw ed liket iray arum ya totoo,
singa no manbabantay iray parada.
Siak, anggapoy pibabalik.
Singa ugaw antis ton naaralay onimis,
anggapoy naliliknak.

Walaan day arum ya totoo;
Siak, anggapok a balot.
Manteteyenteyeng ak,
singa payabol.
Singa atapis, anggapoy kargay utek ko.

Maliwaway arum;
ambilbilunget ak.
Matdem ira;
epe-epel ak.
Walay gagalay bilay da;
anggapoy nansumpalan ko.
Unor-unor ak labat ed daluyon,
milmila ak labat ed dagem.

Nikadkaduma ak.
Onsususo ak ed Baleg ya Ina.