Renacimiento

tan saray un-uni na anuyiao

naabuek a tawen

Pigaran asin lay insibuag ko'd bintanak. Mandongilngil ira’y musian managogul. Akin kinemkem so derleng mon benger? Anta manpapanabos ni lambëngat. Piaet a makabolos so ilalam. Singamuno inkolada'y kawës a apagëw. A kuan mo no manuk a binmayes na bagu to.

Among all the natives of these islands, the Pangasinanes appear to me to be the most active and industrious, very energetic in producing profit and knowing how to make a scantly capital increase in all possible manner.

Nagmaliw a pugaro'y Parnasu. Amagamaga'y dalin, tan baog — nanparan limmëtak. Anggan say esaes, nakatan la. Katon natan et singa ta bulong a apiglas. Ontëtëdtër so dinmanum a liknaan. Ya nën kalabian da ni'n ampopo. Dalayonë'y tarëm so sankagatin a pitëk. Ta pian manlukon ya amayamay a tepet. Naipaway lay kawës a atalimagmagan. Kasanlilikna labusa'y mansasabon posapos na ilalam. Lobir ya amalur, angga'd natan ag ni apaksot na dila ton nanaandi bubuninëngë'y kisame. Ag makarëën so kamarërwak, mangakalitong na dungap. Lakapen to ka anggano ag mampapatanir. Tinmaynan ak ta pian naanap koy dilak ya abayag kon alengwanan a gawak. Tuan aliwan magano so mangitilak. Ed insaew da'ray labitewen aliwa lan malinak so labin pitutuyawan ko ed ilalam. Gala ed silir kon ambilunget. Sika so anlong kon ag nasumpal.